Skyldur skrásetjara

Skráning í Gegni er samstarfsverkefni aðildarsafnanna.

Bókfræðifærslurnar eru sameign safnanna og bera þau sameiginlega ábyrgð á að skráð sé í samræmi við þær reglur sem eru í gildi hverju sinni.

Virða ber samþykktir skráningarráðs og vinna samkvæmt þeim.

Samstarf skrásetjara felst m.a. í að leiðrétta villur og/eða galla sem þeir kunna að rekast á í bókfræðigögnunum. Ef ritið er íslenskt ber að hafa samráð við skrásetjara íslensks efnis á Landsbókasafni, póstfangið er gegnir@landsbokasafn.is. Ábendingar um fæðingar- og dánarár, verk ranglega eignuð höfundi o.þ.h. eru vel þegnar. Augljósar innsláttarvillur í erlendu efni ber að leiðrétta. Ef ástæða þykir til að breyta höfði þarf að hafa samband við safnið sem lagði færsluna inn - ekki gert án samráðs.

Landsbókasafn ber endanlega ábyrgð á skráningu efnis sem gefið er út á Íslandi.

Fari skrásetjari ekki eftir settum reglum um skráningu í Gegni, þrátt fyrir að hafa fengið ábendingar þar um, fær hann senda bréflega áminningu frá formanni skráningarráðs Gegnis, með dæmum um það sem er ábótavant. Tilkynningu skal einnig senda yfirmanni viðkomandi skrásetjara og ritstjóra bókfræðigrunns Gegnis.

Verði skrásetjari ekki við ábendingum um úrbætur innan tveggja vikna, miðað við eðlilega viðveru á vinnustað, verður mál hans tekið til umfjöllunar í skráningarráði, þar sem afturköllun skráningarheimildar er tekin fyrir og afgreidd.

Leiðrétti skrásetjari samkvæmt fyrirmælum útnefnir skráningarráð tilsjónarmann sem fylgist með vinnubrögðum og leiðbeinir viðkomandi næstu mánuði. Ef tilsjónarmaður metur - og leggur fram dæmi þar um - að skrásetjari taki ekki leiðbeiningum ákveður skráningarráð hvort afturkalla skuli skráningarheimildina.