Færslusnið (templates) fyrir bókfræðifærslur innihalda fyrirfram skilgreind svið og deilisvið sem skrásetjari fyllir út eftir því sem við á. Færslusnið eru aðgengileg í lýsigagnaritlinum. Hægt er að skoða öll aðgengileg færslusnið með því að velja Færslusnið í hliðarstikunni. Athugið að velja undirflokkinn Marc 21 Bib til að sjá færslusnið fyrir bókfræðifærslur.
Að búa til ný færslusnið
Ný færslusnið má búa til frá grunni eða með því að velja færslu eða færslusnið sem þegar er til í kerfinu. Vinna færsluna eða færslusniðið eins og við á, og vista svo sem færslusnið (Vista -> Vista sem færslusnið). Passið að smella ekki á Vista, því þá vistast færslusniðið sem bókfræðifærsla.
Færslusnið eru vistuð annað hvort sem lokuð eða sameiginleg. Sé færslusniðið vistað í sameiginlegri möppu, er það öllum í Gegnissamlaginu aðgengilegt og mikilvægt að gefa því lýsandi heiti. Veljið heiti sem hefjast á safnakóða þess safns sem vistar færslusniðið, og hafið í huga að virk færslusnið raðast í stafrófsröð í færslusniðs valmyndina/felligluggann. Athugið að ekki er hægt að breyta eiginleikum færslusniða (t.d. heiti þess) ef það er vistað í sameiginlegri möppu. Skrásetjari getur að auki búið til lokuð (private) færslusnið, sem eingöngu eru aðgengileg þeim notanda. Hér þarf ekki að huga að reglum um heiti færslusniða.
Athugið að færslusnið mega aldrei innihalda svið 001, 005 og sæti 0-5 í sviði 008 verða að vera óútfyllt þegar færslusnið er vistað. Athugið að þegar 008 er opnað með Ctrl+F er ekki hægt að skilja eftir auð sæti. Kerfið fyllir þau sjálfkrafa með fyrsta valmöguleika í fellilista fyrir viðkomandi sæti. Til að skilja eftir auð sæti í sviði 008 þarf að skrifa ? inn í sviðið meðan það er lokað. Passið að telja vandlega út rétt sæti. Til að vera viss um að spurningamerkin séu á réttum stað er hægt að opna sviðið og þá eru sætin með spurningamerkjunum feitletruð.
Sameiginleg færslusnið frá Landsbókasafni
Landsbókasafn hefur vistað færslusnið fyrir algengustu tegundir viðfanga í sameiginlegu möppunni. Til þess að þessi almennu færslusnið raðist efst í stafrófsröð færslusniða, bera þau öll heiti sem hefjast á *
Að virkja færslusnið og raða þeim í felliglugga
Hver skrásetjari velur hvaða færslusnið skulu vera aðgengileg í valmynd þegar ný færsla er skráð. Þetta er gert með því að smella á nýtt -> grunnstilling fyrir birtingu færslusniða og virkja þau færslusnið sem eiga að birtast með því að velja „birta í valmynd“
Færslusnið sem hafa verið valin til birtingar eru blámerkt. Þau sem eru falin eru grá.
Þegar þau færslusnið sem eiga að birtast hafa verið valin, smellið á „vista“.
Að breyta eða eyða eigin færslusniðum
Skrásetjari getur breytt eða eytt eigin færslusniðum. Það er gert með því að hægrismella á færslusniðið og velja viðeigandi aðgerð. Breytið ekki eða eyðið færslusniðum annarra skrásetjara. Sé þörf á nýjum sameiginlegum færslusniðum eða breytingum á sameiginlegum færslusniðum sem hefjast á * má senda ábendingar á netfangið gegnir (hjá) landsbokasafn.is